Sideblikk
Solbergs forhandlingsministerium
For mange i Granavolden-regjeringa stod på sitt utan å seia: «Ja vel, statsminister».
Statsminister Erna Solberg poserte saman med proffboksar Cecilia Brækhus etter sigeren i VM-kampen mot franske Anne-Sophie Mathis i Oslo Spektrum hausten 2016.
Foto: Vegard Wivestad Grøtt / NTB scanpix
Erna Solberg held seg til Edmund Burkes og Lars Roar Langslets konservative credo «forandre for å bevare». Erna omstiller for å halda på posisjonen som stjerna. Ved innskrenkinga fornya ho den grå og kjedelege regjeringa med å gjera sin trufaste arbeidshest, Jan Tore Sanner, til Consul og finansminister. Ho stokka litt rundt på tronpretendentane, og ho nytta høvet til å kvitta seg med Anniken Hauglie, som var ein parlamentarisk klamp om foten.
Dei to små tullepartia fekk driva sin eigen personalpolitikk av indremedisinske grunnar. Knut Arild Hareide kom inn som forsonar og brubyggar i den forvirra kristenflokken. For Venstre, som manøvrerer i rotete vatn ved iskanten, skal Abid Raja hoppa etter Wirkola som kulturminister. Trine Skei Grandes grep er det same som Trygve Bratteli prøvde då han i si tid plasserte dei konkurrerande skabbhalsane Bye, Steen og Nordli i same regjeringsseng. Det var ikkje vellykka, for i bakgrunnen spøkte Gro Harlem Brundtland.
ALLE ERNA SOLBERGS fire regjeringar har vore forhandlingsministerium. Det begynte i Nydalen etter at dei raud-grøne tapte valet i 2013. Ho fekk ikkje forhandla fram ei borgarleg firepartiregjering, men KrF og Venstre avtalte å samarbeida som parlamentariske støttehjul for den blå-blå Sundvolden-regjeringa. Konstruksjonen heldt fram då Venstre melde seg inn i Solberg II på Jeløya. Solberg III blei fødd som fleirtalsregjering i ein stall ved søsterkyrkjene på Granavolden etter ein komplisert abort i Kristeleg Folkeparti. Då blei forhandlingane og kompromissa flytta inn i regjeringa.
Firepartilykka var kort. Framstegspartiet melde seg ut og skal vera eit hardbalent opposisjonsparti, men Solberg IV styrer likevel vidare – utan så mykje som ei rådslaging på Cafe Fiasco, på det politiske grunnlaget Frp ikkje lenger vedkjenner seg. Den innskrenka regjeringa har samla seg i bånn, og Erna Solberg har utvida, fornya og forvirra det parlamentariske repertoaret.
***
RETTINGAR. Vertinna meinte i førre Sideblikk at distrikts- og digitaliseringsminister Linda Hofstad Helleland (LCHH), med doping (Ren idrett, skittent spill) som frivillig særemne, er ein automatisk snakkemaskin som seier sitt same på innpust og utpust, same om spørsmålet er «wa da» eller noko heilt anna.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
