FILM

Siri Helle

siri@dagogtid.no

Av dei 100 mest utbytterike filmane i USA i fjor, hadde 29 prosent kvinnelege protagonistar. Det er 7 prosent meir enn i 2015, har Center for the Study of Women in Television and Film ved San Diego State University funne ut. Sjansen for å finne ei kvinneleg heltinne i filmen vert tredobla om minst ein av regissørane og/eller manusforfattarane er kvinner.

Flest kvinnelege «heltar» var det i komediar, medan menn framleis fører kampen i drama og actionfilmar. Om ein ikkje tel heltar, men rollefigurar som får lov til å seie noko, har menn 68 prosent av rollene.

Til saman fann forfattarane av studien at 9 prosent av rollefigurane i alle filmane dei har sett på, er framstilte som leiarar. 11 prosent av dei mannlege rollefigurane hadde leiarroller, medan 5 prosent av kvinnerollene fekk slike kvalitetar. Ein monaleg mindre skilnad enn i røyndommen, med andre ord.

Sidan forlagsbransjen er meir kvinnedominert enn filmbransjen (78 prosent av dei tilsette er kvinner, syner ei undersøking frå 2014), aukar sjansen for kvinnelege heltar om filmen er basert på ei bok.

Ei av dei som har sett seg føre å få fleire sterke kvinner frå bok til film, er Reese Witherspoon og produksjonsselskapet hennar, Pacific Standard, som mellom anna er stifta for å finne samansette kvinneroller. To av bøkene ho har gjort om til filmar – Wild og Gone Girl (begge i 2014) – har til saman fått tre oscarnominasjonar. Witherspoon sikra seg filmrettane før bøkene var komne ut.