Saka som splitta regjeringa

Christian Anton Smedshaug er medlem av Sps sentralstyre og sat i det regjeringsoppnemnde utvalet som i fjor la fram ei ny utgreiing om Noregs forhold til EU. Han meiner retninga i EU – både økonomisk og når det gjeld ønskje om ei stadig større samfunnsregulering – har utvikla seg langt utover det som er den politiske konsensusen rundt EØS i Noreg.

– Den norske konsensusen handlar om at vi skal delta i den indre marknaden og dei fire fridomane i EU. Det er ikkje eit opplegg for å vere med på reguleringar av korleis bustadhus skal sjå ut, eller kva energiklasse dei skal ha. Utviklinga vi no ser, er ei sprenging av dei noverande rammene rundt EØS-avtalen, seier han.

Smedshaug understrekar at han ikkje har vore med å avgjere spørsmålet om framleis regjeringsdeltaking eller ikkje. Dag og Tid snakka med han torsdag føremiddag, like før det var stadfesta at Sp gjekk ut av regjeringa. 

­– Er dei tre direktiva verkeleg ei sak verd å gå ut av regjering på?

– Det er i alle fall ei sak det er lett å forklare og tydeleggjere kvifor ein går ut på, at den stadig større reguleringsaksepten gjennom EØS-avtalen til slutt møter veggen. Det skjer jo heller ikkje berre internt i Sp. Frp har om lag same argument, og det har også Raudt og SV. Det byrjar å verte eit betydeleg breitt parlamentarisk grunnlag for dette.

– Men desse direktiva vil etter alt å døme verte gjennomførte uansett, om det skjer no eller etter valet. Slik sett er det berre ei symbolsak?