Kommentar
Der piggtråd og rettsløyse blir velsigna av Trump
Offera for falske skuldingar og vilkårlege arrestasjonar er i ferd med å bli mange i El Salvador.
Menneskerettar og lovverk blir sette til sides både i El Salvador og i USA. Vilkårlege arrestasjonar kan føre rett til storfengselet Cecot, som tryggingsministeren i USA Kristi Noem her inspiserer.
Foto: Tia Dufour / Department of Homeland Security
Sjå for deg ein nabo som irriterer deg. Du trykker på kortnummeret til politiet, kjem med ei anonym skulding – og dagen etter er naboen borte. Kan hende ville du juble i starten, slik ein kunne gle seg over at El Salvador fekk stagga gjengkriminaliteten gjennom massearrestasjonar da president Nayib Bukele kom til makta i 2019.
Snart var vilkårlege drap på gata historie, valdsutøvarar bak lås og slå. Det vart slutt på å ha hjartet i halsen når du landa i San Salvador, slutt på den tida da dette var verdas skrekkland med flest mord per innbyggjar. På rekordtid vart det trygt å reise rundt til vakre strender og pittoreske vulkanar, og presidenten var superpopulær.
Den karismatiske Bukele, med velståande palestinske foreldre, tok på seg «ryddejobben» etter å ha vore borgarmeister i hovudstaden for venstrepartiet FMLN. Under mottoet Nuevas Ideas sa han farvel til ei venstreside som låg i grøfta etter omfattande korrupsjon, og allierte seg med den liberale høgresida. Utdanna i kommunikasjon som han var, kunne han kjapt mangedoble talet på likes i sosiale medium og snart bli feira som bitcoinpioner. Og det skulle kome meir enn skryt frå storebror i nord.
Ein arv av håp
Mange av mine venner og kontaktar i El Salvador rakk å nyte eit gløtt av håp, fryde seg over å gå i fred på gata, besøke stadene ein lenge måtte unngå. Ei stund kunne vi snakke fritt via ulike digitale kanalar, utan frykt besøke kvarandre.
Det er fantastisk å bli ønskt velkommen til flyplassen med namn etter martyren erkebiskop Oscar Romero, helgenerklært og eit symbol for alle dei sivile offera som ein brutal borgarkrig kravde. Eit stort portrett av Romero heng også på kontoret til den noverande presidenten. Romero vart skoten i 1980 etter at han frå altaret ropte ut si formaning om å få slutt på all undertrykking, få slutt på all fattigdom. Eg kjende mange av dei som stod saman med han i kampen for eit rettssamfunn, for grunnleggande menneskerettar. Ei av dei var jurist og parlamentsmedlem Marianella Garcia Villas, som fleire gonger kom hit til Stortinget for å appellere om hjelp. Ho vart torturert før ho vart skoten i 1983.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
