Senter for IKT i utdanninga (SIKT) finst ikkje lenger, det vart fusjonert med Utdanningsdirektoratet i 2018. Trond Ingebretsen, som var direktør for senteret frå 2012 og fram til fusjonen, arbeider i dag i Utdanningsdirektoratet. Han meiner samarbeidet med New Media Consortium var til nytte for SIKT.

– Senteret hadde behov for ein internasjonal samarbeidspartnar med ein veletablert metode og verktøy for å skildre scenario og teknologitrendar, seier Ingebretsen.

– I media i Noreg vart Horizon-rapporten i 2013 breitt omtalt og gjerne presentert som forskingsbasert. Kan Horizon-rapportane seiast å vere forsking?

– SIKT har ikkje hevda at desse rapportane var forsking, trendanalysar er sjeldan det. Vi har ikkje oversikt over korleis pressa har omtalt rapportane.

– Eg skjøner at de ikkje hadde kontroll over alle framstillingar i pressa. Men trur du ikkje at også politiske avgjerdstakarar har oppfatta rapportane som meir vitskapleg funderte enn dei var? «Horizon Report er det viktigste grunnlagsdokumentet vi har for å se inn i framtiden, sammen med føringer fra staten, KS og EU», heiter det i «IKT-handlingsplan i Elverumskolen».

– Eg kan ikkje spekulere på korleis media og kommunar har tolka desse trendrapportane, men merkar meg at Elverum også viser til EU, KS og staten.

Les også: «Teknologireklame med statsstøtte»

–?Burde ikkje Senter for IKT i utdanninga informert betre om at NMC var oppretta av selskap som hadde sterke økonomiske interesser av at produkta deira skulle takast i bruk i skulane?

– NMC var ei uavhengig stifting i 2013. Det var norske og skandinaviske ekspertar som var informantane, gjennom en strukturert Delphi-prosess (metode for å nå konsensus i ei ekspertgruppe, red.merk.), og som sjølve var med på å stemme fram dei mest aktuelle og realistiske scenarioa og teknologitrendane. Styret ved NMC hadde ingen påverknad på innhaldet i rapporten, seier Ingebretsen.