Tyrkia

Erling Folkvord

Etter Hamas-angrepet på Israel 7. oktober er American Colony, det tradisjonsrike og trivelege «journalist-hotellet» i Jerusalem, igjen fullbooka. Redaktørane vil ha nytt frå Gaza-krigen. Erfarne journalistar utfører livsfarleg, men nødvendig arbeid.

Ukrainas forsvarskamp når sjeldnare fram til førstesidene. Andre krigar blir knapt nemnd.

Sist veke skreiv Cecilie Hellestveit at Nato-landet Tyrkia er «i gang med sin største militære operasjon mot kurdiske grupper i Syria nokosinne». Bombene fell kvar dag. Tyrkia har trappa opp terroriseringa av dei som bur nær dei tyrkisk-okkuperte områda i Syria. Krigsmetodane liknar Israel: Vassforsyning, elektrisitetsverk, skolar, helsestasjonar og sjukehus er bombemål. Tyrkiske dronar er treffsikre.

8. oktober, dagen etter Hamas-angrepet, slo Tyrkia igjen til mot det sjølvstyrte kurdisk-arabiske området i Nord- og Aust-Syria (AANES): Presis bombing av narkotikapolitiet sitt utdanningssenter utafor byen Derik. Resultat: 29 døde og 28 skadde.

Skulle vi tenkje oss noko liknande i Norge, måtte det bli eit terroråtak mot Politihøgskolen i Stavern, Kongsvinger, Bodø eller Oslo. Norske medium ville kanskje brukt ordet massakre.

Angrepet 8. oktober var eit blodig handslag til narkoindustrien. Både smuglarane og dei som produserer captagon (amfetaminbasert narkotika) lenger vest i Syria, bør takke Tyrkia. Erdogans metode liknar dei verste narkotikakartella sine angrep mot politiet i Colombia.

To spørsmål til utanriksminister Espen Barth Eide:

1. Kva meiner du om at ein Nato-alliert bombar narkotikapolitiet i eit naboland?

2. Viss du er meir enn «bekymret», vil du da sende ein offisiell protest til president Erdogan?

Erling Folkvord er medlem av partiet Raudt.