Rock

Earth:

Full upon her burning lips

Sargent House

Earth – kalla opp etter Black Sabbaths andre forsøk på bandnamn (det første var Polka Tulk Blues Band) – er eit amerikansk rocke- og metalband som speler ekstremt sakte. Bandet blei stifta i 1989 og er blant pionerane innan sjangeren dronerock. Det førre albumet deira, Primitive And Deadly frå 2014, var noko av ein avstikkar, sidan det inneheldt vokal, ganske ukarakteristisk for eit band som vanlegvis speler monoton, seig, mørk og utstrekt instrumentalmusikk, men no er bandet tilbake i instrumentalsporet med Full Upon Her Burning Lips.

I verdstoppen

For tida opererer Earth som duo, samansett av primus motor Dylan Carlson på gitarar og Adrienne Davies på trommer og perkusjon. Det er ikkje lett å spele sakte, iallfall ikkje på trommer. Det kan underteikna av erfaring skrive under på. Når det gjeld saktegåande trommespeling, er Davies i verdstoppen, og på denne plata er ho i betre form enn nokosinne. Det er ein fryd å høyre den akkurat passeleg slapsete timingen hennar og framifrå fotarbeid med hi-hat-pedalen.

Stilblanding

Samstundes durar Carlson i veg med massive gitar- og bassprogresjonar – og det vert spesifisert i tilhøyrande informasjon at han òg opererer duppedittar og forsterkarar, for dronerock lyt trass alt inkludere distortion og feedback. Det er Carlson så god på at det læt som den mest naturlege ting i verda, og i blandinga av stilelement frå så forskjellige sjangrar som doom metal, country og jazz er dette faktisk svært fengjande og avslappande. Annan musikk med like slafsete driv som dette skal ein leite lenge etter.

Rasmus Hungnes

Rasmus Hungnes er musikar og fast musikkmeldar i Dag og Tid.