Jazz

Ola Kvernberg:

Steamdome

Ola Kvernberg, fiolin, bratsj, tangentinstrument, gitar, teremin, trommer og perkusjon; Øyvind Blomstrøm, gitar, baryton gitar og pedal steel gitar; Nikolai Hængsle, bass; Daniel Buner Formo, Hammond B3; Erik Nylander, Hans Hulbækmo og Børge Fjordheim, trommer og perkusjon. GRAPPA GRCD4569

Nok eit festivalprosjekt har materialisert seg på plate. Denne gongen er det ei felles tinging frå Jazzfest i Trondheim og Moldejazz som har resultert i dampande og sydande musikk frå eit sterkt stjernespekka lag med lokførar og fyrbøtar Kvernberg i front. Han får god hjelp av bassist Hængsle og tre trommeslagarar/perkusjonistar i kolskuflinga. Sjølvsagt er Kvernberg komponist og arrangør.

Medrivande

I tillegg til å vera proppfull av medrivande musikk er Steamdome også eit eklatant prov på breidda i den musikalske orienteringa og det enorme potensialet i Kvernbergs skaparkraft. Det er ikkje meir enn tre år sidan han gav ut Mechanical Fair, ei utgjeving der strykeinstrumenta hadde ein meir framskoten plass og der inspirasjonen var henta frå den klassiske eller samtidsmusikalske verda.

Organisk

Steamdome er ei heilt anna skål. Her representerer rytmeseksjonen eit berande og gjennomgåande element som Kvernberg byggjer og utviklar temaa på. Kor organisk dette kan gjerast, får ein døme på i min eigen favoritt på plata, «Caterpillar». Kvernberg har så absolutt sans for klanguniverset til Ennio Moricone, noko som er meir enn tydeleg i «And Now». Plata er, saman med Liarbird, eit høgdepunkt i Kvernbergs karriere.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.