Elektronisk

Telan Devik:

Retro Illuminated Vol. 2

telandevik.bandcamp.com

Ein musikarven av meg hevda nyleg at det ikkje finst musikksjangrar lenger. Han tenkte nok på tydelege, breie sjangrar som pop, rock og jazz, men eg lista like gjerne opp eit utval nyare sjangeromgrep: seapunk, witch house, vaporwave, som alle peiker mot estetiske rørsler med opphav i internettkulturen.

Fleire stilelement

Mitt første møte med den grønlandske artisten Talan Deviks musikk kom gjennom ein youtubemix av vaporwave, eller i det minste musikk som den som sette saman spelelista, meinte hadde noko med vaporwave å gjere – for grensene mellom sjangrar er heller flytande for tida. Vapor tyder «damp», og den heimekokte definisjonen min går nokolunde slik: primært elektronisk musikk som låner stilelement frå svunne sjangrar frå relativt nær fortid, gjerne for å drive harselas med populærkulturens flyktige natur, destillert gjennom samplingar frå stemningsmusikk frå til dømes gamle dataspel og heismusikk.

Referansespekka

Vidare har eit vell av forvirrande undersjangrar (simpsonswave, mallsoft, fashwave, trumpwave etc.) oppstått. Om Talan Devik best kan kategoriserast som vaporwave, er ope for debatt, men så har det trass alt alltid vore slik at sjangeromgrep er meir eller mindre hendige verkty for å tale om likskapane mellom forskjellige kunstnariske prosjekt. Okke som er Talan Deviks nye plate ei underhaldande og fredsæl elektronisk musikkoppleving, spekka med referansar til både Street Fighter, ymse techno-stilartar og MacGyver – og dessutan er musikken tilgjengeleg gratis og lovleg på Internett.

Rasmus Hungnes

Rasmus Hungnes er musikar og fast platemeldar i Dag og Tid.