Jazz/samtids-
musikk

Vidar K. Schanche:

Awakening

Vidar Schanche, gitar, Dag Sindre Vagle, vokal og gitar, Nils Økland, fiolin og hardingfele, Arild Hoem, saksofonar, John Lilja, bass, Ståle Birkeland, trommer og Eva Bjerga Haugen, vokal (10). Bekkrecords

Vidar K. Schanche er ein musikar du garantert har høyrt viss du følgjer med på kva som skjer på jazzscenen i Stavanger. I tillegg til sitt eige prosjekt EGG3 har han jobba med så vidt ulike konstellasjonar som Kitchen Orchestra, Morten Abel, Janove Ottesen, Pål Jackmann og Gunhild Seim – for å nemna nokre.

Prisa

I 2014 fekk Schanche Morten Mølster-prisen, og året etter var han klar på Maijazz med premiere på tingingsverket Awakening. Han har samarbeidd med den britiske tekstforfattaren Ray Kane, og Awakening er blitt eit suiteliknande verk med ein gjennomgåande tematikk som går inn i spaningsfeltet draum/røyndom og saknet etter det som ein gong var.

Mektig

Musikken kan vera mektig, ja, nærast brutal, som «Grey Line 2», eller det motsette – neddempa, melodisk og poetisk i «Warming Lights». Men ein verbal og musikalsk raud tråd bind desse motsetnadene saman, og dette er Schanches store forteneste. Han skal også ha stor ros for å ha sett saman eit band som tilfører musikken særpreg. Å høyra Nils Økland i denne samanhengen er nesten som ei oppvakning i seg sjølv, men alle musikarane viser seg frå si aller beste side. Skal ein få til noko slikt, må ein ha ein orkesterleiar som viser tillit og samstundes veit kva han er på jakt etter.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.