Jazz

Maciej Obara Quartet:

Unloved

Maciej Obara, altsaks; Dominik Wania, piano; Ole Morten Vågan, bass; Gard Nilssen, trommer. ECM 2573

Sjølv om Maciej Obara har komponert alle låtane utanom tittelkuttet, som er ført i pennen av den langt meir kjende landsmannen Krzysztof Komeda, og bandet ber Obaras namn, er dette ein felles manifestasjon. Komposisjonane er langt meir enn skisser, men dei er likevel opne for intervensjon.

Intervenert til gagns har dei gjort alle fire i Rainbow Studio for om lag eit år sidan. Kvartetten har ei kollektiv tilnærming til det å skapa musikk. Her rår ikkje eit tradisjonelt solist­–komp-mønster grunnen. Her får musikalske idear utvikla seg side om side, eller den eine ideen inspirerer og går saumlaust over i den andre, som i den friske og raske «Echoes». Den energiske låten bryt med stemninga på plata elles, men representerer eit forfriskande og kjærkome oppbrot. Likevel er det heilt i tråd med det overordna musikalske konseptet at dei tek det heilt ned på slutten av låten og skapar ein perfekt intro til den impresjonistiske balladen «Storyteller». Det frie samspelet mellom Wania, Vågan og Nilssen her er nok eit høgdepunkt på plata.

Obara og Wania møttest for ti år sidan i bandet til Tomasz Stanko. Kvartett vart dei for vel fem år sidan. Dette er travle musikarar, og det er ikkje så ofte dei får høve til å spela saman. Men at dei har spelt saman ein del, etterlét ikkje plata tvil om.

Lars Mossefinn

Lars Mossefinn er lærar ved Voss gymnas og fast jazzmeldar i
Dag og Tid.