Rock

L.A. Witch:

L.A. Witch

Suicide Squeeze Records

L.A. Witch starta opp i 2011, og har fått rykte på seg som eit framifrå liveorkester. Parallelt med den iherdige turnéverksemda, har nokre smakebitar kome ut i form av singlar og EP-ar, men først no har bandet gitt ut det første albumet. Som namnet vitnar om, kjem denne trioen frå Los Angeles, og den californiske stemninga er til å ta og føle på. Det er solfylt og varmt, lummert og innhylla i eksos.

Dette er på den eine sida nostalgisk 60-tals garasjerock, surferock med seig, motorisk bassing og sløvsinna piggtrådgitarar – passande musikk til køyreturar gjennom allear av importpalmar, med basstrommepedalen som gasspedal, trommeskinna er solbrente. Men under overflata, bak tåka av vegstøv og eksos, lurer eit lumsk mørke. Plata opnar med ei eigesjuk mordballade kalla «Kill My Baby Tonight», framført med halvvrengt, slurande vokal. Musikken til L.A. Witch kunne passa som lydspor til ein moderne westernfilm regissert av David Lynch og Quentin Tarantino i tvibeite.

Den store mengda livespelingar har gjort dei tre medlemmene – Ellie English på trommer, Irita Pai på bass og Sade Sanchez på gitar og vokal – svært samspelte. Fleire av låtane på albumet har blitt utgjevne i andre variantar i løpet av dei siste åra, men debutalbumet har late vente på seg. Låtmaterialet har fått mogne, bandet har tatt seg tid til å gå nokre rundar i studio for å fange raffinementet, og resultatet er framifrå.

Rasmus Hungnes

Rasmus Hungnes er musikar og fast platemeldar i Dag og Tid.