Elektronisk

Forest Swords:

Compassion

Ninja Tune

Den britiske artisten Matthew Barnes lagar elektronisk musikk under pseudonymet Forest Swords. Compassion er den andre LP-en hans, og det musikalske uttrykket er mørkt, med slektskap til klubbmusikksjangrar som trip-hop, techno og dub.

Moderne stilelement blir blanda med samplingar frå nær og fjern – stundom læt det austleg, somme tider som lydsporet til eit vikingtokt i eit alternativt univers, ofte med krigstrommeaktig perkusjon, kraftfulle blåsar- og strykararrangement og vokalliner samansette av oppklipte korsamplingar. Resultatet er ei plate full av motsetnader, som på same tid læt overdådig dramatisk og avslappande hypnotisk.

Ifølgje pressemeldinga er plata «ein respons til den tvitydige, aggressive nye verda vi opplever og kommuniserer i», og rett nok tangerer Forest Swords tematikk tematikken ein finn att i dagens science fiction: Blandinga hans av det gamle og det nye har mykje til felles med Kenji Kawais musikk til filmatiseringane av cyberpunksoga Ghost in the Shell, og i fjor sette han musikk til In The Robot Skies, ein spekulativ kortfilm om forholdet mellom menneske og maskin filma utelukkande med dronar. Musikkvideoane bringar tankane i retning postapokalyptiske soger som Mad Max og dataspelet Horizon: Zero Dawn, der mennesket har vendt tilbake til stammesamfunnsstrukturar – på godt og vondt. Compassion, på si side, er ei utelukkande god plate.

Rasmus Hungnes

Rasmus Hungnes er musikar og fast musikkmeldar i Dag og Tid.