Elektronisk

Com Truise:

Iteration

Ghostly International

Dersom ein «bakar snakkvendt», blir Com Truise Tom Cruise, men det eigentlege namnet til denne amerikanske artisten er Seth Haley. Han jobbar med musikk som kan omtalast som synthwave, ein sjanger som hentar inspirasjon frå gamle dataspel og 80-tals filmmusikk à la sci-fi-B-filmkongen John Carpenter, Vangelis’ Blade Runner-lydspor, Twin Peaks-Angelo Badalamenti og MacGyver-vignetten.

Ekspertisen til Com Truise ligg i å hamre saman overstrøymande, fyldige og milde lydbilete av ymse syntar, trommemaskiner og samplingar. Ifølgje skribleriet som følgjer utgjevinga, fortel plata legenda om ein robotastronauts kjenslevare reise gjennom verdsrommet, samstundes som ho er resultat av artistens strev med å bryte ut or ei kreativ sperre, noko det kan sjå ut som om han konsulterte Brian Enos orakelsystem Oblique Strategies for å få til: «Repetition is a form of change», seier ein av dei 900 aforismane.

Platetittelen Iteration tyder nettopp gjentaking, men her læt ikkje to takter identiske. Små variasjonar over rytmar, bassliner og melodiar kjem som glattpolerte perler på ei svinaktig fint samantvinna snor. Kvar minste vesle lyd, både dei tunge basslinene, knasande sprø perkusjonssamplingar og luftige, vektlause syntmelodiar, er ein fryd for øyret, og det er ein fryd for denne meldaren å kunne tilråde lesaren å leske sine eigne lytteorgan med denne plata.

Rasmus Hungnes

Rasmus Hungnes er musikar og fast musikkmeldar i Dag og Tid.