Elektronika

Four Tet:

New Energy

Text Records

Gjennom ein snart tjue år lang karriere har briten Kieran Hebden lefla med sjangerelement lånt frå postrock, frijazz, hiphop og folkemusikk frå både her og der. (Enkelte har kalla musikken hans «folktronica».) Og han har samarbeidd med artistar som improvisasjonsmusikktrommeslagaren Steve Reid og Radiohead. Four Tet er ein elektronikaartist av det eklektiske slaget.

Musikken på New Energy er langt mindre monoton enn den framifrå førre plata, Morning/Evening frå 2015, som var samansett av to meditative, langstrekte spor baserte på subtile variasjonar av repeterande motiv. Det vi får her, er 14 låtar på eitt til åtte minutt kvar. Inspirasjonen frå housemusikk er stadig sterkt til stades, med mjukt pumpande basstrommer og fengjande snuttar framførte med eksotiske strengeinstrument, snerten perkusjon, ordlaus, oppklipt bakgrunnsvokal, avslappande bassliner og syntar, med ei rekkje samplingar det ikkje alltid er godt å seie kvar kjem frå.

I minidokumentarfilmen Looking Backward, Moving Forward avslører Hebden at enkelte av samplingane han brukar, kjem rett ut or dagleglivet hans. Han trur at dersom musikken er bygd rundt ei «ryggrad av røynd», vil lyttaren få ei kjensle av det personlege, sjølv om det ikkje nødvendigvis er uttalt kva kjelda til det ein høyrer, er. Filosofien ser ut til å fungere: Resultatet denne gongen er ei roande plate som gir ny energi.

Rasmus Hungnes

Rasmus Hungnes er musikar og fast platemeldar i Dag og Tid.