Rock

Stella Donnelly:

Beware of the Dogs

Secretly Canadian

«You only like me when I do my tricks for you», heiter det i «Tricks», ein nøkkellåt på australske Stella Donnellys nye album, Beware of the Dogs. Songen insisterer på retten til ikkje å vere så sjølvutslettande medgjerleg og kjem med velretta spark mot nokre av artistens landsmenn òg.

I eit intervju med DIY oppunder jul fortalde Donnelly kor griselei ho kjende seg av livet som vokalist i eit coverband som spelte på oppdrag i bryllaup, på bedriftsfestar og liknande tilstellingar der ho ofte fekk uønskt merksemd frå menn i publikum. Ei kort pressemelding som følgde «Tricks» då songen kom ut for noko sidan, stadfestar at han ikkje minst var ei lita helsing til idiotane som hadde ropt og skrålt til Donnelly dei søndag ettermiddagane ho måtte bruke på å spele «Wonderwall» til døde.

Klar melding

Det var fleire som fekk med seg Donnelly då ho var innom både Oslo og Bergen seint i august i fjor, og viste seg som ein av desse sceneartistane som kan klare å trollbinde eit konsertpublikum åleine med ein kassegitar. Donnelly veit dessutan å lage ein låt med klar melding. «Boys Will Be Boys», ein song om valdtekt skriven i 2016, gjorde henne breitt kjend då han vart nettpublisert av Pitchfork, noko som førte til at Donnelly fekk ei massiv mengd hatmeldingar frå alskens kokande sinte, kjellarmørke troll.

Songen var å finne på EP-plata Thrush Metal, som nådde endå fleire gjennom ei amerikansk relansering ved selskapet Secretly Canadian, etter at utgivinga først kom ut på Healthy Tapes våren 2017. Då Donnelly vitja South By Southwest i Austin i fjor på denne tida, hadde ho vorte eit av namna mange merka seg.

På Beware of the Dogs, spelt inn i Freemantle i nærleiken av heimbyen Perth, er halvparten av songane framførte åleine med gitaren. Resten er akkompagnerte av eit tett, basisk rockeband, med Jennifer Aslett på bass, Talya Valenti på trommer og George Foster på gitar – eit smart grep, for det har vorte rett så variert og dynamisk over 13 songar.

Velretta spark

Dei som har sett pris på Donnellys godt plasserte spark før, vil heller ikkje verte skuffa no, for dei dukkar opp fleire stader på Beware of the Dogs. Meldinga i «Old Man» peilar godt inn tidsskiftet metookampanjen har ført med seg: «You grabbed me with an open hand/ the world is grabbing back at you/ oh, are you scared of me, old man?»

Ikkje overraskande har Donnelly nemnt låtskrivarar som Billy Bragg og Courtney Barnett som inspirasjonskjelder, førstnemnde fordi han forankrar det politiske engasjementet sitt i forteljingar frå kvardagen, sistnemnte fordi ho lagar treffsikker, lakonisk verbalrock.

Stella Donnelly lagar songar som går rett inn i samtida vår. Beware of the Dogs slår hardt – og slår rett.

Øyvind Vågnes

Øyvind Vågnes er forfattar og fast musikkskribent i Dag og Tid.