Rock/jazz

Hedvig Mollestad Trio:

Ding Dong. You’re Dead

Hedvig Mollestad, gitar; Ellen Brekken, bass og sag; Ivar Loe Bjørnestad, trommer. Rune Grammofon

Hedvig Mollestad er ute med den sjuande trioplata sidan debuten Shoot i 2011. Utgjevinga kjem etter det kritikarroste tingingsverket Ekhidna frå Vossa Jazz i 2019 og som kom på plate året etter. Mollestad har fem av sju låtar på samvitet. Bekken har signert to. Fans av trioen får det dei forventar. Her er feite riff, råe groovar – ei musikalsk urkraft som trioen heilt frå starten har kombinert med eit raffinement som ikkje er daglegdags i sjangeren.

Plata opnar med Bekkens «Leo Flash’ Return to The Underworld». Den riffbaserte låten slår an tonen, og Bekken opnar ballet med eit effektprega basskor. Dette inspirerer Mollestad til eit av dei sterkaste solistiske bidraga på plata. «All flights Cancelled» opnar med eit enkel og kraftfullt riff som blir transponsert før låten etter halvtanna minutt går over i eit Rypdal-inspirert tema med ditto inspirasjonskjelde i gitarsounden og frasane.

Tittelkuttet er meir eit varsel om kva som er i vente, enn eit ferdig forma meisterverk. Det som er i vente, får ein servert i den andre låten til Bekken, «Magic Moshroom». Her utfordrar trioen kvarandre til gagns. Bekken er rett og slett overalt. Trioen gjev ikkje ved dørene. Allereie på neste låt, «The Art of Being Jon Balkovitch», ei hylling til Jon Balke, toppar dei det heile med noko som byrjar som ein invitt til dansegolvet, før Mollestad serverer eit skakt bluesaktig tema som Scofield ville ha vore stolt over å ha laga. Resten er berre ein fest i intrikat samspel og speleglede. Den beste trioplata Mollestad har gjeve ut.

Lars Mossefinn

Lars Mossefinn er lærar ved Voss gymnas og fast jazzmeldar i Dag og Tid.