Elektronisk
musikk

Lost Cascades:

Exodus

Pacific Plaza

No når dei fleste har ekstra heimetid, er det nok mange som fantaserer om andre stader. Då er det passande å ta ein lytt på ein type elektronisk musikk som manar fram imaginære plassar: Vaporwave-relaterte artistar som Equip, R23X og Lost Cascades lagar lydspor til dataspel som ikkje finst (andre stader enn i fantasien), og sist ute var sistnemnde.

Det latinske ordet exodus tyder utgang, og på albumet Exodus tek Lost Cascades oss med på ein fredsæl ekskursjon. Dette er ei spanande, men trygg reise driven fram av behagelege, runde syntetiske lydar over opne sletter og fjell, gjennom juv og dal og ei og anna hole.

Koronakrisa kastar ljos på hola i kapitalismen og avslører kor skjørt dette systemet faktisk er. No hender det vi har blitt fortalt var umogeleg: Økonomien kjem ikkje lenger i første rekke, og vi samarbeider om mål som gagnar andre og oss alle. Det syner at vi faktisk kan omkalfatre måten samfunnet er organisert på, for å stagge den komande klimaapokalypsen, sikre etterkomarane våre ein sunn planet og gjere slutt på sosial ulikskap og fattigdom.

Filosofen Mark Fisher skreiv om omgrepet capitalist realism, ein kollektiv tilstand der det er enklare å sjå for seg verdas undergang enn enden på kapitalismen. No har kapitalistrealismen blitt suspendert, og vi har ein unik sjanse til å snu den kollektive skuta. I denne tida er det essensielt å løfte fram og setje i gang fantasien, og den kan Lost Cascades’ musikalske eskapadar stimulere og vere til inspirasjon for.

Rasmus Hungnes

Rasmus Hungnes er trommeslagar, kunstnar og fast musikkmeldar i Dag og Tid.