Frå tid til anna må det vere lov å bruke denne spalta til å lovsynge dei verkeleg gode platesjappene, dei med unik eigenart og karakter, og for nokre veker sidan var eg i ei slik, nemleg Peaches i New Orleans.

Butikken ligg i desse dagar nokre få kvartal frå huset der Dylan spela inn Oh Mercy med Daniel Lanois på slutten av 1980-åra, og i nabolaget til (dei faste kundane) Win Butler og Régine Chassagne (Arcade Fire). Butler brukar frå tid til anna å leike seg som DJ Windos 98 når han treng ein pause frå Arcade Fire og finn platene sine i hyllene hos Peaches.

Peaches har eksistert i fleire lokale og med skiftande identitet sidan eigar Shirani Rea starta med platesal i 1975. Og jammen om det ikkje var ho som tok oss imot då vi steig over dørstokken ein vinterdag 45 år seinare. I hyllene fann vi eit eklektisk utval i alle tenkjelege og utenkjelege sjangrar, ispedd sjeldne godbitar her og der.

Viktig for identiteten til det store rommet er også ein lunsjdisk, datert til 1940, då det var ein Woolworth-butikk i lokalet. Her organiserte nemleg borgarrettsforkjemparar ein av dei første såkalla «sit-in»-protestane tidleg i 1960-åra. Rea tek godt vare på disken og har gjort han til ein merkestad midt i butikken i Magazine Street. Stikk innom om du er på dei trakter!

Øyvind Vågnes