I dag ville John Lennon ha fylt 80 år, om han ikkje vart skoten ned på open gate og døydde i New York for 40 år sidan, i 1980. Att sat enka Yoko Ono, som saman med ein av Lennons to søner, Sean, har kuratert og produsert ei ny samling som kjem ut i dag, Gimme Some Truth. The Ultimate Mixes (Capitol/UMe).

Boksen kjem i både digital og fysisk utgåve, og ein luksusversjon inneheld ei bok med intervju, fotografi, brev og anna frå det som i presseomtalar vert kalla «Lennon-Ono-arkivet». Det er vanskeleg ikkje å lese føreordet til Yoko Ono utan å spekulere i kva Lennon ville ha sagt om verda slik ho ser ut i dag, om han var i live: «He believed in being truthful and that the power of the people will change the world.»

Lydteknikar Paul Hicks har stått for remiksen, med instruks frå Ono om å ta vare på og respektere originalopptaka, men å forbetre med ein klårare og reinare lyd i tillegg til å styrke Lennons vokal. Smakebiten som har vore tilgjengeleg i nokre veker, «Instant Karma» (1970), tyder på at dei har følgt mandatet. Songen, som i si tid fekk Lennon med på Top of the Pops – eit opptak som er lett å finne på YouTube – tok det ikkje lang tid å lage. «Instant Karma» vart spelt inn same dag som han vart skriven, og kom ut ti dagar seinare, då Lennon fortalde pressa at han «skreiv songen til frukost, spelte han inn til lunsj og gav han ut til middag».

Øyvind Vågnes