Litt før påske kom Both Sides of the Sky (Sony), det siste albumet i ein trilogi som samlar dei viktigaste uutgitte studioopptaka som fanst i arkivet etter at Jimi Hendrix (1942–1970) gjekk bort så tragisk tidleg.

Dei føregåande platene i serien, Valleys of Neptune (2010) og People, Hell and Angels (2013) fekk mykje merksemd då dei kom ut, og no er turen kommen til eit knippe låtar laga i tidsrommet januar 1968 – februar 1970.

Fokuset i materialet ligg på tilnærminga Hendrix har til bluesuttrykket, og det er artig og fascinerande å lytte til versjonar av låtar som Muddy Waters-klassikaren «Mannish Boy» og Hendrix-gjengangaren «Hear My Train A Comin’» her i ei utgåve frå april 1969. Mellom kuriositetane finst ein versjon av Joni Mitchells «Woodstock», der Stephen Stills er med, månader før Crosby, Stills, Nash & Young gav ut si velkjende tolking.

Eddie Kramer, som var med Hendrix i studio som teknikar på alle plater han laga, har hatt oversyn over produksjonen, slik han har hatt det med mykje av materialet som har vorte tilgjengeleg dei siste åra. Both Sides of the Sky har fleire fine stunder, men lyttaren blir også sittande igjen med ei kjensle av at kvar krok og kvart hjørne av Hendrix-arkivet no er endevendt, og at ein må kunne rekne diskografien som så komplett som råd er.

Øyvind Vågnes