Ei bru over ei uroleg elv, eller ly frå storm eller regn – pophistoria er full av tilbod om trøyst og støtte, med biletbruk frå naturens små og store herjingar, noko som har medverka til å gjere somme songar særleg viktige i krisetid. Då Stevie Wonder skreiv «Shelter in the Rain» (2005), var det til Syreeta Wright, kona som nett hadde døydd av kreft. Men då songen dukka opp igjen på After the Rain, plata Irma Thomas gav ut året etterpå, kjendest det som ei helsing frå artisten til den katastroferåka heimbyen hennar, New Orleans, etter orkanen Katrina.

After the Rain, som i si tid fekk ein Grammy, vart å få på vinyl for første gong i sommar, på selskapet Craft, og tilfellet ville ha det til at orkanen Laura skulle gjere skade på delstatane Louisiana og Texas berre nokre veker etterpå. I eit intervju med musikkbladet Uncut fortel Thomas (79) at ho sjølv vart råka hardast av orkanen Camille i 1969. Vinylutgåva av After the Rain gav særleg gjenklang hausten 2020, frå artisten som har vorte kalla The Soul Queen of New Orleans.

Øyvind Vågnes