Eg vart først merksam på Barbara Lewis (f. 1943) via Julia Holter (f. 1984), som tolka hennar «Hello Stranger» på Loud City Song (2013), der den snertne, Hammond-orgel-drivne, shoo-bop-shoo-bop-låten vart transformert til ein eterisk, varm kunstpopballade – ein fin måte å verte introdusert for Lewis på: ein framifrå soulartist og også komponist.

Lewis skreiv sjølv «Hello Stranger», til dømes, som først kom ut på Baby I’m Yours (1966), ei av platene som er å finne i den nye samlinga Don’t Forget About Me: The Atlantic & Reprise Recordings (SoulMusic Records), som rommar album gitt ut på dei to selskapa, totalt 68 songar, frå tidsrommet 1962–1968 og 1972, på tre CD-plater.

Men du kan godt finne vegen til den herlege musikken til Lewis på enklare vis enn dette, det kan internettet sjølvsagt hjelpe deg med. Og det finst godsaker utanom boksen også, ikkje minst på den Chicago-innspelte plata ho laga for selskapet Stax, The Many Grooves of Barbara Lewis (1970), som er hakket råare enn det meir kjende materialet frå midten av 1960-talet. Kvar du no enn vel å ta til, Lewis laga musikk som er som skapt for ein fredagskveld.

Øyvind Vågnes