Jazz

Skarbø Skulekorps:

Innesko

Signe Emmeluth, altsaksofon og elektronikk; Eirik Hegdal, C-melodisaksofon, klarinett og vibrafon; Stian Omenås, trompet og synth; Erik Johannesen, trombone og elektronikk; Ivar Grydeland, pedal steel og gitar; Chris Holm, bass og synth; Øyvind Skarbø, trommer, perkusjon og synth; Mari Kvien Brunvoll, vokal (4).
Øyvind jazzforum

Sjølv om repertoaret i korpsrørsla har forandra eg mykje dei siste 50 åra, kan ikkje det Skarbø Skulekorps held på med, kallast korpsmusikk. Dette er jazzbandet for folk som ikkje likar jazz, hevdar Skarbø sjølv, men han må finna seg i at folk som likar jazz, synest det er spanande å følgja med på dei mange musikalske krumspringa hans.

Den tredje plata til «skulekorpset» er ikkje noko unnatak. Her er strigla amerikansk 80-tals funk, vemodig frisellsk americana, melankolsk indierock og intrikat og gjennomarrangert jazz i ei herleg blanding.

Utgangspunktet var ein dag i studioet og konsert same kvelden for vel eit år sidan. Seinare er stoffet miksa og stramt redigert med ein lang låt etterfølgd av ein kort manifestasjon. Plata opnar med «Miami», som kunne ha vore tittellåten til ein amerikansk krimserie frå 80-talet.

Det er imponerande at Skarbø lagar ein heilskap av noko som i utgangspunktet spriker i alle retningar, men Skarbø er som Per Borten flink til å bera staur. Dei regigrepa Skarbø har gjort, har ein pris. Også på denne plata er det lite rom for solistiske ytringar. Skarbø har gjort tøffe og kloke val. Innesko fortener å bli lytta til frå første til siste kutt utan pause.

Lars Mossefinn

Lars Mossefinn er frilans journalist og fast jazzmeldar i Dag og Tid.