Musikk
Multikulturell techno
Acid Arabs tredje album er ein fryd for øyret og dansefoten.
Det fransk-algeriske musikkollektivet Acid Arab blandar austleg musikk med elektroniske dansemusikksjangrar som acid house og techno, og på sitt tredje album (tittelen er det austarabiske teiknet for talet tre, etterfølgt av det franske ordet trois) har dei med seg ei mengd vokalistar frå Nord-Afrika, Syria og Tyrkia.
«Algerian gasba, Anatolian trance, synthetic dabkeh, bionic ral...» Som albumnotata antydar, er Acid Arabs musikk fasettert. På «Habaytak» står ei blanding av transeinduserande elektroniske og akustiske lydar, rungande synthbass og den fransk-marokkanske songaren Ghizlane Melih i høgsetet, medan acid house-inspirasjonen er klar som dagen på «Rashid Trip», ein låt som sanneleg får hjartet til å pumpe. Ein 80-talselektropopliknande synthmelodi vert blanda med stemma til syriske Wael Alkak på tredjesporet «Ya Mahla», medan avslutningssporet «Sayarat 303 Part II» har ein munnharpeliknande synthsjamanistisk naturtoneklang.
«Leila» er ein djup og dundrande dabkhetechnolåt med flytande puls, og musikkvideoen, full av heimebrent og magedans, endar med ein tankevekkjande og augeopnande tvist kring identitet og kulturelle kryssingspunkt.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
