Verdsmusikk

Karl Seglem:

Mytevegar

Karl Seglem,
tenorsaksofon, bukkehorn og vokal; Jorunn Barane, vokal; Eirik Dørsdal, trompet; Erlend Viken, feler og kalimba; Ardhi Engel, fløyter, røyr, strengeinstrument og elektronikk; Bendik Smedaasgjelten Quam, bukkehorn; Saleh Mohfoud, kanun og vokal; Andreas Vold Løwe, Lars Jakob Rudjord og Andreas Ulvo, tangentinstrument; Jørn Erik Ahlsen Alkanger, Henrik Bergersen, Ketil Thorbjørnsen og Kasper Dyve, gitar; Stein Villa, harpe og dronesiter; Ragnhild Knutsen, bratsj; Roger Morland og Ellen Brekken, bass; Hallvard Gaardløs, bass og vokal; Kåre Opheim, trommer og perkusjon; Alf Magne Hillestad, trommer, perkusjon og elektronikk.
Nye Nor

Denne plata har Seglem arbeidd med i mange år. Ei aning grønt, som kom tidlegare i år, var eit førevarsel, men der forgjengaren hadde preg av litt av det meste, har Mytevegar ein klar verkkarakter med ein gjennomgåande tematikk.

Tekstane er henta frå diktsamlinga Djup redsle. Djup ro (Samlaget, 2022). Det tematiske kan oppsummerast i nyordet solastalgi, upresist forstått som sorg ved tap av natur, med andre ord djup redsle. Den djupe roa ligg i vissa om at det er maktpåliggjande å handla på vegner av naturen, til forsvar av naturen.

Seglem kan nytta prosa eller prosaliknande tekst med tilvising til FNs klimapanel for å skildra den stødige vegen vår mot avgrunnen. I «Daudi Balders» brukar han forteljinga frå Snorre-Edda som eit bilete på den komande miljøkatastrofen, men Seglem er aldri forkynnande eller agiterande.

Dei 14 låtane på dobbelt-LP-en er spelte inn på mange stader. Seglem har fått hjelp hjå 20 musikarar og lydteknikarane Tor Magne Hallibakken og Alf Magne Hillestad. Seglem har henta inn musikarar og instrument etter kva musikken kravde. Resultatet ber preg av kompositoriske idear som er knesett gjennomførte til minste detalj. Her er ikkje rom for solistiske utflukter og spontan meiningsutveksling. Det er ikkje noko sakn. I denne samanhengen er den strenge regien naudsynt. Sjølvsagt pregar musikarar som Kåre Opheim og fleire andre musikken, men ikkje i ein jazzmusikalsk forstand.

Seglems tekstar er på nynorsk, men han talar til heile verda. Det gjer han utan at tekstane er omsette.

Lars Mossefinn

Lars Mossefinn er frilans journalist og fast jazzmeldar i Dag og Tid.