Jazz

Liv
Andrea Hauge Trio:

Ville blomster

Liv Andrea Hauge, piano; Georgia Wartel Collins, bass; August Glännestrand, trommer.
Hubro

Ville blomster er den andre plata til Liv Andrea Hauge Trio. Trass i at besetninga er den same og låtane er skrivne av Hauge, er utviklinga frå debuten Live from St. Hanshaugen slåande. Det har sjølvsagt samanheng med at debuten blei teken opp berre ei veke etter at dei hadde byrja spela saman. Medverknad i turné- og mentorprogrammet Footprints har sveisa saman trioen, og nokre dagar i Atlantic Studio i Halden har dei brukt særs godt.

Dei åtte låtane har svært ulik karakter, og det er fin variasjon i korleis trioen nærmar seg stoffet. Sjølv om improvisasjonselementet er til stades i rik mon, står den einskilde komposisjonen på eigne bein. Opningskuttet «Det vokser ville blomster på månen» er ein idyllisk vals med eit matt strøk av melankoli og bass- og pianokor som får fram djupna i låten, spesielt Hauges hint til Jan Johansson er elegant.

Hauge kombinerer også det enkle og lyriske med støykontrastar i «Vår». Kontrastane blir brukte på anna vis i «Fri flyt», og trioen kastar seg hemningslaust ut i den frie improvisasjonen «Du og jeg, baby».

Hauge er tettast på inspirasjonskjelda si, Keith Jarrett, i den gospelinspirerte «Gullregn». Fascinerande er det også å høyra korleis Hauge utviklar «Istid» med det sarte temaet og dei tilbakevendande arpeggioane. På Ville blomster er den råe energien frå debuten erstatta med mangfald og refleksjon.

Lars Mossefinn

Lars Mossefinn er frilans journalist og fast jazzmeldar i Dag og Tid.