Det fanst mangt av innspelt musikk som ikkje kom ut i den tida Sonic Youth eksisterte (1981–2011), og kvifor ikkje då lage eit arkiv på Bandcamp der interesserte lyttarar kan grave litt i skuffene til bandet? Som sagt, så gjort, og siste tilskot på den kanten er dei fem spora samla på In/Out/In (Three Lobed Recordings), som dokumenterer åra etter tusenårsskiftet, med to studioopptak frå Echo Canyon Studio i New York (2000), eit opptak frå ein lydsjekk på ein konsert i Pomona i California (2010) og to heimeopptak (2008).

For folk som meg, som var seint nok ute til verkeleg å oppdage Sonic Youth med seine album som Murray Street (2002) og The Eternal (2009), for så å gå tilbake til plater som Daydream Nation (1988), er kanskje denne utgivinga særleg interessant. Då kan ein oppdage «Machine», eit spor laga under arbeidet med den femtande og siste studioplata, The Eternal, som er såpass eksperimentelt at det ikkje vart teke med den gongen. Bandcamp-sida til bandet er også staden om du ønskjer å finne gamle konsertopptak som dokumenterer dei ulike fasane i denne indieinstitusjonens rikhaldige historie.

Øyvind Vågnes