På hylla framføre meg her står det ein liten treboks eg er ganske glad i. Han inneheld fire CD-plater, éin DVD og eit lite astrologisk kart ein kan brette ut. Eg kan ikkje hugse kva slags platesjappe eg kjøpte utgivinga på, men året var 2007, då Jason Molina (1973–2013) gav ut Sojourner, som eg har forstått at det med åra har vorte ganske vanskeleg å få tak i. For dei som har prøvd, har eg godt nytt: Utgivinga kjem no på vinyl (rett nok utan filmen The Road Beomces What You Leave, som ein til gjengjeld kan sjå på nettet).

Det er ein fin miks som er samla på Sojourner: albuma Nashville Moon (produsert av Steve Albini), Black Ram (produsert av David Lowery) og Soshola (eit opptak gjort av Molina sjølv), og så er det den vesle EP-en Sun Session, som vart spelt inn i Sun Studio i Memphis våren 2006, og som inneheld fire spor, mellom dei nydelege «Hold On Magnolia».

Då bandmedlemet Pete Schreiner skreiv om denne tida på nettsida Jasonmolina.com for fire år sidan, løfta han fram nett opptaka frå Memphis, som vart spelte inn litt spontant dagen etter at bandet hadde hatt ein konsert i klubben Hi-Tone: «In many ways it captures the spirit of the Magnolia band the best – flipping the switch from club mode to studio mode and making music that was unique to the time and place the band was at.»

Øyvind Vågnes