1963 var eit år for mann–kvinne-duettar i popmusikken. Paul & Paula med «Hey Paula» og April Stevens & Nino Tempo med «Deep Purple» hadde toppa Billboard Hot 100.

Sam (S.J.) Montel dreiv plateselskapet Montel Records i Baton Rouge, Lousiana. Fengande swamp pop med lokale artistar var profilen.

Ein av artistane var pianisten og songaren Dale Houston som hadde det eine beinet i country og det andre i rockabilly. I 1963 tok S.J. med seg Houston og cajunvokalisten Grace Broussard til plateinnspeling i Lafayette. Høgdepunktet i innspelinga blei coverversjonen av ein ballade som ikkje selde i originalversjonen til rhythm & blues-duoen Don & Dewey i 1957. Timinga var betre for Dale & Grace, som duoen på Montel Records blei heitande.

I veka som byrja 17. november, var Dale & Grace øvst på Hot 100. Om kvelden 22. november skulle dei spele med Dick Clark’s Caravan of Stars i Dallas i Texas. S.J. og artistane stod på trappa til hotellet og vinka då kortesjen til presidentparet passerte. Dale & Grace gjekk til romma for å kvile. Dei kunne høyre skota tre kvartal bortanfor. Så kom landesorga.

Det tok slutt for duoen òg, men songen lever enno. Sonny & Cher spelte ho inn. Det same har Linda Ronstadt, Freddy Fender, Jimmie Vaughan og mange andre gjort. I 1974 fekk Donny & Marie Osmond ein Top 5-hit med låten. Ein klassikar.

Øyvind Pharo