Ungdomsroman

Lars Mæhle:

Andromeda

Samlaget

Andromeda er ein av galaksane i nabolaget til Mjølkevegen. Dei kjem til å kollidere med kvarandre om fire millionar år. Slike fascinerande fakta er mellom ingrediensane når Mæhle bryggjar ungdomsbøker. Så hiv han aktuelle problemstillingar, truverdige motiv, humor, spenning, høgt driv, friskt språk og ei likning som skal løysast, opp i gryta.

Simon er 16 år og flyttar inn i den tredje fosterheimen sin. Raskt skannar han skulen for taparar og vinnarar. Simon kan slåst, men vil ikkje. Han vil sjå på stjerner i teleskopet på rommet sitt. Helst saman med emojenta i nabohuset. Mobbinga av vesle Pippin i klassen appellerer til Simons sans for rettferd. Kan han slåst for andre enn seg sjølv?

Mæhle tek eit godt grep om lesaren når han startar forteljinga i retrospekt. Simon får ein sjeldan sommarfugl i gåve, saman med ein lapp. «No må du halde din del av avtalen», skriv Pippin. Så spolar vi tilbake. Kva har hendt? Kva er avtalen? Forfattaren låner element frå krimsjangeren i opprullinga av mysteriet.

Boka er opprørande og spanande, interessant og inspirerande. Lars Mæhle kan å skrive ungdomsromanar, det er som om han har knekt ein kode og kjenner oppskrifta. Mi innvending er at løysinga på likninga er for enkel og verkar forhasta. Kva om litt av svaret hadde vore opp til lesaren å finne? Andromeda hadde ikkje blitt dårlegare av det.

Janne Karin Støylen

Janne Karin Støylen er bonde og litteraturvitar.