Anne Hansen: «Æresutstilling, keramikkarbeider i retrospekt»

Det gule huset på Holmen i Asker

30. november–20. januar

Utstillinga viser eit tverrsnitt av verka til keramikaren og kunsthandverkaren Anne Hansen (1948–2018). Ho er mest kjend for keramikkrelieff etter avtrykk frå tekstilar og gjennomhola blondefat av leire.

Martin Parr: «Life’s a beach»

Utstillinga står til 19. april

Perspektivet Museum, Tromsø

I vinterkulda kan ein varme seg på strandbilete ved Perspektivet Museum. Den kjende engelske Magnum-fotografen Martin Parr stiller ut eit breitt spekter av scener frå solgylne strender verda over. Med eit godt blikk for absurditet så vel som det humoristiske, har han fanga mange kostelege augneblikk. Ofte har fotografia ein kritisk undertone, strandlivet er ikkje så uskuldig som ein skulle tru.

Marte Aas: «Francine (was a machine)»

17. januar–28. april

Kunsthall Trondheim

Marte Aas viser film, fotografi og objekt i ei stor separatutstilling. Utstillinga tematiserer gleder og sorger ved kunstig intelligens. Eit av hovudverka er ein filmatisk fabel om den mekaniske dokka til den franske filosofen og vitskapsmannen René Descartes. Det går soger om at han bygde ein svært livaktig erstatning for dottera Francine, som døydde tidleg. Francine kan sjåast på som ein forløpar til vår tids Sophie, som har mimikk og kan føre ein dialog.

Mønstring 2018

10. november–3. februar

Sogn og Fjordane kunstmuseum, Førde

Kvart tredje år vert det arrangert ei mønstring av kunsthandverk og biletkunst frå Sogn og Fjordane. Utstillinga presenterer eit breitt spekter av teknikkar og uttrykk og gir eit spennande innblikk i kva som går føre seg i regionen.

Beatkunst. De glemte malerne

Punkt Ø ved Galleri F 15, Moss

27. oktober–16. januar

Galleri F 15 løfter fram ei mindre kjend side ved amerikansk kunst. Beatkunsten var uttrykksfull, gjerne spontant utforma av enkle material som dei hadde for handa. Det kvilte ein aura av bohemliv kring desse kunstnarane.

Arbeida er i hovudsak lånte frå Wennesland-samlinga i Kristiansand, som er den største samlinga av beatkunst i verda.