Drama / Thriller

Regi: Fatih Akin

Ut av intet (orig. tittel: Aus dem Nichts)

Med: Diane Krüger, Denis Moschitto, Numan Acar, Samia Muriel Chancrin

Det er ein vanleg ettermiddag i Hamburg. Katja (Krüger) leverer son sin til pappa Nuri (Acar) før ho treffer den høggravide systera Birgit (Chancrin). Då ho kjem tilbake for å henta familien, møter ho politisperringar, og ho innser at reisebyrået mannen driv, er sprengt i lufta. To nynazistar står bak attentatet, og i rettssaka som fylgjer, får me eit sørgjeleg, fortvilande innblikk i kor vanskeleg juss står seg mot rettferd.

Heilskap

Tysk-tyrkiske Fatih Akin er ikkje redd for å påpeika rasisme i filmane sine, noko som med bakgrunnen hans både er naturleg og samstundes ekstra dristig. Regissøren er kanskje mest kjent for Mot veggen (2004) og Soul Kitchen (2009). Med Ut av intet dreg han inn høgreekstremisme i si aller verste form. Her finst ingen formildande omstende for det blonde kjærasteparet som sit med steinansikt overfor den nyslegne, nedslegne enka i rettsalen, ikkje i korleis me som sjåarar skal oppfatta dei. Og advokaten deira er så erkeslem at det nesten blir dumt. Akin framstiller ikkje Katja og mannen som englar, men han hadde nok vunne på å nyansera dei to nazistane og advokaten. Samtidig kjennest det litt godt å sleppa laus hatet overfor desse strøymingane som me diverre ikkje kan oversjå. Hovudoppgåva til filmen er å visa meiningsløysa bak noko slikt – og kva ein gjer dersom ein vel å gjengjelda hatet.

Høgspenning

Ikkje på noko tidspunkt er me usikre på om dei skuldige faktisk er dei skuldige. Thrilleren ligg i jussen, og det kan vera nervepirrande nok. På det meir mellommenneskelege, og her er Akin alltid god, oppstår det spenningar både mellom Katja og familien og mellom Katja og advokaten, Danilo (Moschitto). Handlinga og stemninga er fortetta, det finst ingen daudpunkt. Kva gjer ein i eit så skrekkeleg scenario som dette? Diane Krüger er knallgod som forbanna og knust av sorg. Eg skulle gjerne visst kva ho synest om rollefiguren sin, og eg tryglar om at eg aldri må finna meg i same situasjon som Katja. Om ikkje Ut av intet er noko lett søndagsfilm, er det heller ikkje ein av desse intenst deprimerande filmane der alt verkar håplaust. Å kalla det god underhaldning kjenner eg skurrar, men det er i grunnen det det er. Av den tankevekkjande sorten.

Brit Aksnes

Brit Aksnes er frilans kulturarbeidar og fast filmmeldar i Dag og Tid.