Musikk
Feilmelding frå innsida
Prewn tek det vrengde og usminka frå nittitalsrocken og nyttar det skremmande godt i si eiga uro.
Izzy Hagerup, altså Prewn, gjer eigen uro til klaustrofobisk og godt leven.
Foto: Harry Wohl
Uro og kaos er ikkje berre ein tilstand ein prøver å kvitte seg med. I kunsten kan slikt vere eit drivstoff. Mange av dei mest presise uttrykka og ideane blir til når tankane ikkje går i takt, når kroppen ikkje finn ro, og når alt byrjar vibrere litt for mykje. Slik uro pressar fram eit språk som ikkje kan polerast vekk, og ein lyd som ikkje kan glattast over. Ei kraft som gjer kunsten meir sann og mindre komfortabel.
Nokre artistar jobbar mot uro. Amerikanske Prewn jobbar med henne. Ho, for bandet er berre éin person, lèt uroa brusa gjennom låtane, i små vibrasjonar av age, otte og von. System er eit album som har oppstått i ein dirrande kropp. Levenet står med begge bein i britisk og amerikansk alternativ rock frå skiftet mellom åtti- og nittitalet, ei tid prega av ei tydeleg stemningsendring: bort frå det polert mot det råe, personlege og vrengde, både i lyd og tekst.
Systemsvikt
Prewn – uttalt prune, som i sviske – hentar inspirasjon frå ei rausare, meir utvida forståing av sjangeren. Det er artistnamnet til Izzy Hagerup, eit namn som kombinerer Guns N’ Roses-gitaristen Izzy Stradlin med lyrikaren Inger Hagerup. For norske øyre kan det lyde som ein Harald Eia-karakter, ein parodi. Det er lite med Prewn som er parodisk. Men mykje er tungt og tragisk.
På debuten skreiv ho songen «But I Want More» frå perspektivet til faren, som med Parkinsons sjukdom vart isolert frå familien på sjukeheim i over eit år under pandemien. Kvar linje svir, i skildringa både av omsorg og av korleis eigne evner, eige system sviktar.
Denne evna til ikkje å pakke noko inn er endå sterkare på dette albumet. Særleg på tittellåten «System», som skildrar ein person som står fast i eigne tankar, lamma av frykt, press og forventningar. Likskapen med songen om faren ligg ikkje berre i teksten, men i korleis arrangementet opnar seg langsamt mot ei urovekkjande, energisk kraft. Og ein cello.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
