Drama

Regi: Gaspar Noé

Climax

Med: Sofia Boutella, Kiddy Smile, Souheila Yacoub

Etter elendige Love er den særeigne argentinskfranske og alltid skandaleklare regissøren Gaspar Noé tilbake med ein smell. Pengelens har han kokt opp ei avgrensa scene for den nye filmen, eit aude øvingslokale ei vinternatt. Her skal eit danseensemble feire ein føreståande turné der dei skal vise New York at fransk dans er best. Festen tar fort fyr med ein durabeleg breakdancebattle, men det blir blodig alvor då nokon har sprita opp sangriaen.

Dansbart

Sofia Boutella er det næraste ein kjem ei hovudrolle som koreografen Selva. Ho er ikkje berre actionhelt frå filmar som The Mummy og Kingsman: The Secret Service, men profesjonell dansar, i likskap med resten av rollelista i Climax. Det synest. Dansescenene er fantastiske, med suggerande musikk og grenselaus kroppskontroll. Som stivbeint reddhare som skyr dansegolvet, tar eg meg i å halde rytmen i kinosetet. Lydsporet opnar med Gary Numan og er dominert av pulserande fransk house frå nittitalet, som Daft Punk, men når røynda raknar, drar det over i Aphex Twin med «Windowlicker». Det passar perfekt som overgang frå dansefilm til syreskrekk.

Primalskrik

Kameraet køyrer gjerne opp ned eller vakar over krumspringa til kroppane. Dopa dansarar som ravar i gangane, minner om Enter the Void, medan heftige scener med brå brutalitet er nesten like kvalmande som Irreversible, båe av same regissør og kameraperson.

Lange sekvensar er utan klipp. Estetikk og skodespel er betre enn i Love, og innhaldet fasinerer meir, sjølv om det er ei enkel forteljing. Den hemningslause stilen speglar tematikken: sivilisasjonssamanbrotet som kjem når frykta spreier seg under det franske flagget bak diskjockeyen. Det primale rår. Det er alltid ei form for hype rundt Gaspar Noé. Denne gongen går eg god for han. Filmen blei stabla på beina lynraskt. Det kan ha sine føremonar, med eit spontant, skrikande friskt uttrykk. Climax er ikkje for alle, men eg tilrår han for dei som jaktar noko annleis og anarkistisk for ei kollektiv kinooppleving.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.