Bilbrannane i Sverige denne veka er skremmande. Omfanget av hærverket var så stort: Over 100 bilar har vorte påtende. I tillegg verkar det heile organisert og planlagt, noko som gjer hendinga endå meir alvorleg.

Dette kan lett skje på nytt. Bilbrannane syner at politiet ikkje har kontroll på dei kriminelle ungdomsmiljøa og gjengane i landet, og fleire stader i Sverige vart brannstiftinga fylgd opp med steinkasting mot politiet. Det syner ein total mangel på respekt for ordensmakta, og det er ikkje rart mange svenske politifolk vel å slutta i jobben.

Det er enno ikkje heilt klart kven som står bak. Somme har spekulert på om nokre av brannane er påsette av høgreradikale grupper som prøver å påverka valet. Men politiet seier at ikkje noko tyder på det. Dei som er mistenkte så langt, er lokale ungdomar som er kjende for politiet frå bydelar der mange har innvandrarbakgrunn.

Om dette er tilfellet, ser vi eit nytt døme på at Sverige har problem knytte til den store innvandringa. Fleire svenske byar har dei siste åra fått store gettoar der flyktningar og immigrantar lever under dårlege butilhøve, der integreringa er dårleg og arbeidsløysa høg. Resultatet er store kriminelle ungdomsmiljø i desse bydelane. Tal som vart lagde fram tidlegare i år, fortel noko om omfanget av gjengkriminaliteten i Sverige: Dei siste sju åra er 131 menneske drepne og 520 skadde i skyteepisodar. Til saman har det vore kring 1500 skyteepisodar i Sverige i denne perioden.

Svenske styresmakter må ta gjengkriminaliteten langt meir alvorleg enn dei synest å ha gjort til no. Det er alvorleg for eit land om innvandrarbefolkninga vert knytt til kriminalitet. Å løysa desse problema er svært viktig både for innvandrarane sjølve og for heile det svenske samfunnet.

Svein Gjerdåker