Dag og Tid har ved fleire høve på leiarplass lagt vekt på å lyfta fram den årlege rapporten frå Amnesty International om bruken av dødsstraff i rundt om i verda.

Årets rapport kom denne veka. Han syner ein ny, gledeleg tilbakegang i bruken av dødsstraff. Talet på avrettingar var rekordlågt i 2020, noko som kan tyda på at merksemd og kritikk av bruken av dødsstraff har ein positiv verknad.

Likevel var 483 personar fordelte på 18 land avretta i 2020. Men, som Amnesty skriv, ein kjenner ikkje tala frå Kina, Vietnam og Nord-Korea. Desse landa held talet hemmeleg, men truleg er det snakk om fleire tusen berre i Kina.

Av dei som oppgjev talet på avretta, kjem ikkje uventa Iran, Egypt, Irak og Saudi-Arabia øvst på lista. Iran åleine med minst 246 avretta.

Metodane for avrettingane er halshogging i Saudi-Arabia, henging i land som Bangladesh, Botswana, Egypt og India, og skyting i Kina, Nord-Korea, Oman, Qatar, Somalia og Taiwan.

USA held seg med giftsprøyte og elektrisk stol. Under president Trump var det uført ti føderale avrettingar i 2020 – dei fyrste føderale avrettingane sidan 2003. Så mange som 2485 sit på dødscelle i USA.

Amnesty gjer eit viktig arbeid i kampen mot dødsstraff. Norske styresmakter bør no, i etterkant av Amnesty-rapportane kvart år, senda ei oppmoding til dei 55 landa som praktiserer dødsstraff, om å avvikla den barbariske ordninga.

Ein kan ikkje kalla seg ein sivilisert stat om ein avrettar folk – same kva dei avretta måtte vera skuldige i.

Svein Gjerdåker