Frå bridgeverda
Money, money, money
Warren Buffett er eit av dei aller rikaste menneska i verda. Mannen til høgre, Bill Gates, har òg til maldonsalt i maten. Her rundar dei av årsmøtet 2019 i Berkshire Hathaway med eit slag bridge.
Foto: Nati Harnik / AP / NTB
Det er eit faktum at det finst ein del rike menn innanfor bridgen. Her på berget har vi til dømes fotballagenten Rune Hauge, som i årevis har vore den fremste norske «sponsoren», altså ein kjøpar av tenestene til gode bridgespelarar i form av makkerskap og lagspeling.
Eit anna kjent fotballfjes, Martin Andresen, er heller inga fattiglus – og han er god i bridge. Kor rik den medieprofilerte aksjemeklaren Jan Petter Sissener er, veit eg ikkje, men han snakkar iallfall som ein rik mann – og han spelar bridge. Lista kunne ha halde fram. Men akk: Våre heimlege rikfolk blir alle smågutar samanlikna med Warren Buffett.
«Orakelet frå Omaha» har ein formue på rundt 150 milliardar dollar og er såleis blant dei rikaste menneska i verda. Pengane har han i all hovudsak tent på kløktige investeringar gjennom holdingselskapet Berkshire Hathaway. Rett nok er han, som ein slags amerikansk Olav Thon, kjend for ein nøktern livsstil. Han bur framleis i eit forstadshus i Omaha som han kjøpte i 1958.
Nokon stor bridgespelar er ikkje Buffett, han innrømmer ærleg at han bruker bridgen for å slappe av. Då han og mangeårig makker Sharon Osberg greidde å kvalifisere seg til sluttspelet i ei tevling, dikta Buffett opp eit plutseleg styremøte for å sleppe unna presset ved den seriøse konkurransebridgen. Men han har spela mykje og vore ein varm forsvarar av bridge som hjernetrim og øving i analytisk tenking.
Nyleg vart tevlinga Buffett Cup arrangert att for fyrste gong etter koronaen. Opplegget er inspirert av Ryder Cup i golf og var i utgangspunktet eit oppgjer mellom dei beste spelarane i USA og Europa. Men no vil ein ny aktør markere seg som bridgestormakt, og i år gjekk tevlinga av stabelen i Shanghai, altså med USA, Europa og Kina som deltakarar. Heldigvis greidde Europa – godt hjelpt av nordmennene Christian Bakke og Boye Brogeland – å vinne denne gongen.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
