Ravatn som
krimforfattar

Agnes Ravatn, som vi kjenner frå Dag og Tid, har overraskande nok vorte nominert til eit prestisjetung britisk krimpris. Petrona Award er ein britisk pris som blir delt ut årleg til «Best Scandinavian Crime Novel of the Year».

Som kjent har Ravatns Fugletribunalet gjort det godt i Storbritannia. I Noreg fekk boka merkelappen roman, men engelskmennene synest merkelappen krim passar like bra.

Nominerte til Nordisk råds pris

Dei nominerte til Nordisk råds barn- og ungdomslitteraturpris 2017 vart annonserte på barnebokmessa i Bologna denne veka, melder bok365.no. Dei to norske nominerte er begge kritikarroste og prisvinnande forfattarar. Den fyrste er Bjørn Ingvaldsen med Far din (Gyldendal) – ei bok som i tillegg er nominert til Arks barnebokpris for 2016 og Bokslukerprisen 2017. Den andre er Anders N. Kvammen med Ungdomsskolen (No Comprendo Press), som i fjor vart tildelt Brageprisen i kategorien barne- og ungdomsbøker

«Jeg synes det er veldig gøy å bli nominert til en så viktig pris. Barne- og ungdomslitteraturen i Norden holder veldig høy kvalitet og jeg setter stor pris på at min bok skal bli vurdert sammen med de beste fra resten av Norden», seier Ingvaldsen til bok365.no.

Kjende namn
til Lillehammer

Litteraturfestivalen på Lillehammer er den største i Norden og går av stabelen i siste helga av mai. No er programmet med forfattarnamn offentleggjort. Ei rekkje kjende forfattarar kjem til festivalen i år, mellom andre Karl Ove Knausgård, den kenyanske forfattaren Ngugi wa Thiong’o, Åsne Seierstad, islendingen Sjón, pakistanaren Kamila Shamsie og amerikanaren Meg Rosoff.

ronny@dagogtid.no