Litteratur

Ronny Spaans

Ronny@dagogtid.no

Tekstforfatterfondet er eit norsk fond for forfattarar av tekstar bruka i musikk. Fondet deler ut stipend finansierte gjennom kopi- og bibliotek-
vederlag. Pengane blir fordelte på prosjektstipend, reisestipend og andre støtteordningar. Men dei gjev òg ut ein årleg ærespris. Æresprisen for 2016 går til eit namn som er kjent for mange lesarar av denne avisa: Håvard Rem.

Rem er ein forfattar og poet som gjennom ei årrekkje har bidrege med songtekstar på høgt nivå til profilerte norske artistar og band, vektlegg fondet, og held fram: Rem har skrive for A-ha, Morten Harket, Sivert Høyem, Kaizers Orchestra, Jan-Ove Ottesen, Vamp, Jørn Hoel, Silje Nergaard og mange fleire. I tillegg til eigne tekstar, som har gjeve han både spellemannspris og NOPAs tekstpris, har han òg gledd artistar og publikum med gjendiktingar av Bob Dylan, Hank Williams og ikkje minst Leonard Cohen. Både Cohen på norsk og Hank Williams på norsk er utgjevne på CD.

I Dag og Tid har Rem skrive ein artikkelserie om songlyrikken, og denne interessa blir òg vektlagd: Prisvinnaren har eit sterkt engasjement for songlyrikken, og han deler meir enn gjerne dei store kunnskapane sine på området med andre som er interesserte i sjangeren. Han er allsidig og kvalitetsmedviten og har tilført norsk populærmusikk uvurderlege og unike tekstar, meiner juryen.