Team Ingebrigtsen er konstant på bana, varme i trøya, og vi som har levd ei stund, og som følger med fordi vi plutseleg er interesserte i friidrett, ser ein klar likskap mellom Team Ingebrigtsen og Jackson Five. For det første driv far til løparane frå Sandnes i Rogaland (Gjert) og far til songarane frå Gary i Indiana (Joseph), ungane sine hardt, mens konene – Tone og Katherine – administrer familie- og karrierelivet, held familien samla, vaskar tonn med klede og tenner lys i gudshus. (Og begge bruker tid på håret.) For det andre kallar Ingebrigtsen-gutane far sin Gjert, framfor pappa eller far, slik Jackson-gutane måtte kalle far sin Joseph.

No fekk Katherine og Joseph Jackson ti ungar, mens Tone og Gjert Ingebrigtsen har fått berre sju. Men det er ikkje for seint å få tre ungar til; Janet Jackson fekk barn i ein alder av 50 år.

I alle fall blei eit par av Jackson-sønene – Sigmund og Toriano – aldri store stjerner, slik eit par av Ingebrigtsen-sønene – Kristoffer og Martin – ikkje blei det, fordi dei heller ville gjere noko anna. Dei tre som er blitt stjerner så langt, Henrik, Filip og Jakob, er sånn passe ulike, akkurat som Jackson-stjernene, og alle får kjærast og nye kjærast på rekke og rad, og barn og bart og gull.

Ingebrigtsen-svaret på Janet Jackson er sjølvsagt Ingrid, som er spådd å bli ei stor stjerne. Når det gjeld La Toya Jackson, har vi inga Ingebrigtsen-dotter å sette henne opp mot, så då får vi berre håpe Gjert har hatt eit sidesprang, slik Joseph hadde, noko som resulterte i ei dotter til.

Heia, heia, kan vi seie: Viss ei ukjend Ingebrigtsen-dotter dukkar opp i neste Se og Hør eller VG, kan det hende heile gjengen spring endå fortare.