Her ein dag stod eg plutseleg framfor denne døra. «Er det verkeleg Faktisk som held til her?» spurde eg meg sjølv. «Faktisk-Faktisk? Med punktum?»

Jo, eg trur faktisk det faktisk er Faktisk som held til bak døra, viss eg ikkje tar feil. Har eg rett, kan det samtidig hende Faktisk faktisk ikkje held til bak døra. Kven veit, eigentleg.

Postvalnytt

Valet er tatt; landet har bladd om og tatt til på eit nytt kapittel med nye ark, nye pennar og nye partinamn, ifølge eit par aviser og forum:

– Fram- og tilbakestegspartiet (Frtp)

– Høgare? (H)

– Tristeleg folkeparti (Trf)

– Vingle (V)

– Bondepartiet (Bp) (Som dei seier sjølv: «Det gamle er best!»)

– Vi er Grøne / Veggispartiet (VeG) (Som dei sa i reklamebyrået som utarbeidde det nye namnet: «Korfor gjere namnet mindre smør-på-fleskete enn det alt er?»)

– Rikmannsarbeidarpartiet (Rap) (Som Jonas Gahr Støre sa på Lorry ein kveld: «Ærlegdom til folket.»)

– Postmoderne sosialistparti (PMS)

Raudt har valt ikkje å endre namn, av reint sosialistiske og taktiske grunnar.

Reaksjonar

Mange er frustrerte etter partinamneendringane. Som ein mann i gata sa: «Endeleg har vi lært oss namna på partia, og så er det på ’n igjen. Ein annan mann i gata sa – berre at denne mannen var kvinne: «Kan dei ikkje berre ta namn etter fargen: Raudt, Rosa, Oransje, Spygrønt, Grasgrønt, Turkis, Adventslilla, Blått og Brunt?»

Ein tredje person i gata sa: «Det er typisk norsk å vere halvgod. Sjølv stemde eg på meg sjølv, i eit eige val eg heldt heime. Heia meg. Gratis er det òg.»

Apropos

Apropos raudt og anarki og sosialisme og sånt, er det interessant at Oslo kommune forbyr oslohundeborgarar å drite.

Hovudstaden, altså! Er det rart folk og fe ikkje har tillit til politikarar, prinsesser og top dogs generelt?