Det må vere tiår sidan folk med litt dømmekraft slutta å bry seg om Dagbladets alarmerande overskrifter om korleis få sommarkroppen på sju dagar eller treningsekspertens 14 øvingar som gjev stram rumpe, eller...? Om lag 1 347 848 les Dagbladet kvar dag, det betyr faktisk at ein heil del får syn på denne typen treningsinspirasjon. 

Treningsmagasina køyrer same taktikk. På biblioteket fann eg eitt av kvar sort: KK, Iform, Aktiv trening og Shape up. Framsider med overskrifter som «Flat og glad mage i hele ferien» gjorde at eg måtte langt inn i kroken for å bla opp. Glad mage handla om korleis ein unngår diaré, og for å få flat mage gjaldt det å gjere mageøvingar.

 Internett og appar som TikTok kjem også med haugevis av treningstips. Utanom rumpeøvingar dukkar det også opp reklame for kosttilskot som Sarmar. Dette er piller som skal gi store musklar og samtidig vere ein sunnare variant av anabole steroid. Sarmar er ulovleg, og biverknadane er auka sjanse for hjarteinfarkt og slag. Dette seier påverkarane lite om. 

 Sjølv om dagens treningsinspirasjon er langt frå kvalitetssikra, er han lett tilgjengeleg. Meir dedikert var den som søkte råd om trening i 1931. Fyrst måtte han få tak i til dømes boka Mosjonsgymnastikk og morgengymnastikk på biblioteket. Så måtte han finne rett kapittel med rett muskelgruppe, og til slutt prøve å tyde svart-kvitt-teikningane med armar og bein i alle vinklar. Viss han enno hadde treningsånda, måtte han sikkert ut på åkeren eller gjere noko anna meir matnyttig.

Maren Bø

Maren Bø er idrettspedagog og frilansskribent