Embetspolitikk

Av Vidar Ystad

vidar@dagogtid.no

Dag Terje Andersen (Ap), som nå leier kontroll- og konstitusjonskomiteen på Stortinget, seier til Dag og Tid at det er all grunn til å fylgje opp denne saka. Han fortel at han i komitémøtet tysdag opplyste om at han vil stille spørsmål til statsminister Erna Solberg (H) om kvifor ho har slege inn på ein heilt ny utnemningspraksis ved å utnemne sitjande statsrådar til nye embetsstillingar. Han vil også ha svar frå næringsminister Iselin Nybø (V) om hemmeleghaldet av søknaden frå Bakke-Jensen, og frå Bakke-Jensen (H) om det same.

Spørsmåla blir sende når Stortinget har fått oversendt regjeringsprotokollane for andre halvår 2020. Regjeringa har frist til 15. februar med å oversende protokollane, som det er kontroll- og konstitusjonskomiteen si oppgåve å granske. Andersen har tidlegare vore stortingspresident og er oppteken av korrekt embetsførsel.

Kritikken mot utnemninga av forsvarsminister Frank Bakke-Jensen til fiskeridirektør har auka i styrke etter at avgjerda frå Sivilombodsmannen i klagen som Dag og Tid fremja mot hemmeleghaldet av søknaden hans, vart kjent.

– I SV har vi nå bestemt oss for å fremje eit konkret framlegg i Stortinget, eit såkalla dokument 8-forslag, som går ut på at Stortinget framleis, som i 1909, meiner at regjeringa ikkje kan utnemne nokon av sine eigne medlemer til nye embetsstillingar, opplyser Torgeir Knag Fylkesnes til Dag og Tid.

Han er nestleiar i næringskomiteen på Stortinget og nestleiar i SV.

Avisa Nordlys i Tromsø fremja på leiarplass måndag krav om at stillinga som fiskeridirektør må lysast ut på ny. Avisa skriv at måten utnemninga har skjedd på, «gjør at det er skapt inntrykk av en politisk ansettelse, som kan svekke den brede tilliten Fiskeridirektoratet er avhengig av langs hele kysten».

– Eg vil stille spørsmål, avvente svar og så konkludere, seier Andersen

Andersen kan fortelje at han sjølv, på bakgrunn av artiklane i Dag og Tid, har sett seg ned og lese igjennom referata frå stortingsbehandlinga av saka om sjølvutnemningane som Løvland-regjeringa gjennomførte då regjeringa gjekk av i 1908.

– Det er interessant kor sterkt og klart stortingsrepresentantane formulerte seg om den praksisen som Solberg-regjeringa nå har innført på ny, seier Andersen.