Rock

The Jesus and Mary Chain:

Damage and Joy

ADA

Eksperimentelt

Pharmakon:

Contact

Sacred Bones

Ifølgje Platon handlar katarsis om sjeleleg lutring, og det er jo i stor grad dette pasjonssoga handlar om: «Mache dich, mein Herze, rein», for å sitere bass-arien i Matteuspasjonen av Bach frå 1727 år etter Jesu fødsel. Dei skotske indieveteranane i The Jesus and Mary Chain platedebuterte i 1984, og med eit slikt namn passar det bra at den første plata på fire år blei lansert kort tid før påske.

Damage and Joy er opp- og nedstemd på same tid. Ved hjelp av halvlystige gitarriff, spretne rockerytmar og tekstar om livsleden framførd med avmålt vokalbruk, durar dei nonchalant av garde med patosinnstillinga på medium. Det betyr slett ikkje at plata er dårleg, men ho meistrar sjeldan å vekkje dei heilt sterke kjenslene i positiv eller negativ forstand. (Mest entusiasme hos denne meldaren kjem av dei meir leikne vendingane med strykarar, feedback og atonal saksofon på låta «Simian Split».)

Den New York-baserte eksperimentelle artisten Pharmakon er langt tydeligare pasjonert – på plata Contact er intensiteten skyhøg. Samanlikna med den tradisjonelle musikalske pasjonen, har ho rett nok meir til felles med samtidsmusikkomponisten Krzystof Pendereckis Lukaspasjons dissonans og tunge perkusjon enn med Bach. Den imponerande dynamiske skrikinga og inderlege metallbankinga til denne dama, akkompagnert av blytunge, elektroniske rytmar, har definitivt ein reinskande karakter som kan passe godt på ein langfredag – lyttaropplevinga er som å kvile på ei sonisk spikarmatte.

Rasmus Hungnes

Rasmus Hungnes er musikar og fast platemeldar i Dag og Tid.