Hip-hop

Kendrick Lamar:

DAMN.

Top Dawg/Aftermath/Interscope

DAMN. er den kaliforniske hiphopartisten Kendrick Lamars fjerde studioalbum. Plata har skapt enorme mengder entusiasme hos musikkmeldarane i verdsaltet, og ho er på sitt beste når rytmane er knallharde, bassen på sitt mest brutale og artisten rappar på sitt mest munnrappe.

Kendrick Lamar er ein virtuos vokalist som veit å spele på kontrastar i både tempo og stemmeleie. Tekstane flyt i den eine augneblunken silkemjukt av garde som ein seglbåt i sønnavinden; i den andre blir dei framførte i eit forrykande, maskingeværaktig tempo. Men det lyrikken fortel, kan stundom verke litt forvirra og forvirrande. Mang ein entusiast har alt prøvd seg på å analysere spora, som alle, i likskap med platetittelen, har fått namn etter eitt enkelt ord i store bokstavar etterfylgt av eit punktum, i samanheng, som eit konseptalbum. Det ser ut til å handle om ei utforsking av ljos og mørke, yin og yang, og det sjølvbiografiske ser ut til å stå i fokus: Avslutningssporet heiter «DUCKWORTH.» Duckworth er etternamnet til artisten.

To av høgdepunkta, låtane «HUMBLE.» og «DNA.», har fått seg nokre ville musikkvideoar som kan anbefalast på det varmaste. (Sjå dei på YouTube). Elles er plata best når ein høyrer gjennom henne frå start til slutt: Då fungerer sjølv dei svakaste, mest sjølvmedynksame spora, slik som «GOD.», og attpåtil dei som har Rihanna og U2 – som på ingen måte er blant favorittartistane til denne meldaren – med på laget.

Rasmus Hungnes

Rasmus Hungnes er musikar og fast musikkmeldar i Dag og Tid.