JAZZ

Bergen Big Band & Dag Arnesen:

Norwegian Song IV

Odin 2016

Pianisten Dag Arnesen gav i perioden 2007–2010 ut tre plater der han tok føre seg «den norske songskatten». Dette er melodiar me kjenner frå folkemusikksamlaren Ludvig M. Lindeman, komponisten Edvard Grieg, notesamlinga «Norges melodier», skulesongbøkene og så vidare. Lite nytt, med andre ord.

Medan dei tre første platene var trio- og kvartettinnspelingar, er det eit langt meir lydsterkt format som kling denne gongen. Bergen Big Band er – rett nok – eit svært disiplinert og dynamisk storband, men likevel er det ein stor kontrast mellom det intime og stillferdige i nasjonalsvisker som «Våren», «Ved Rondane», «Astrid, mi Astrid» og krafta i eit førsteklasses storband. Samstundes som dette er ei utfordring, og av og til litt baktungt, er det dette som gjev plata spanande å lyda til.

Arrangementa er Arnesens eigne. Orkestreringa ber preg av arrangørens underkommuniserte klassiske skolering, samstundes som det vert gjeve rom til gode solistar som mellom andre saksofonistane Elisabeth Trøen Lid og Kjetil Møster, og Arnesen sjølv.

Det er noko klisjéfylt over dette prosjektet som minner oss om nasjonalromantikk og «jazz på svenska» i norsk versjon, men samstundes som me i vår ironiske etterpåklokskap kan flira av alt dette, lyt det seiast at det er modig av Arnesen atter ein gong å laga musikk av desse velkjende ingrediensane. Det er glitrande som storbandmusikk, samspelt kammerjazz, og melodiane er uslitelege. På ingen måte innovativt, men likevel: Det er ei glede å lyda til denne raffinerte samansmeltinga av folkemelodiar, virtuos orkestrering og jazz.

Lyden er dessutan framifrå, og valet av Duper studio og Yngve Sætre som teknikar og produsent lyfter også denne musikkforma.

Sigbjørn Apeland

Sigbjørn Apeland er musikar, musikkvitar og fast musikk-
meldar i Dag og Tid.