Jazz

Hans P. Kjorstad / Ernst Reijseger:

Gap of Ginn

Hans P. Kjorstad, fele, femstrengs hardingfele og harmonium; Ernst Reijseger, cello og shrutiboksar.
Motvind Records

Hans P. Kjorstad er ei drivkraft bak plateselskapet Motvind Records og er mellom anna med i banda til Frode Haltli, Marthe Lea og Andreas Røysum. Reijseger er ein nestor i nederlandsk jazz og improvisasjonsmusikk. Han har vore med i ICP, Amsterdam String Trio og Clusone Trio. I dei seinare åra har han jobba mykje med Harmen Fraanje og Mola Sylla. Han har også spelt mykje i Noreg og samarbeidd både med Stian Carstensen og Mats Eilertsen.

Dei to musikarane møttest på festivalen Blow Out! i Oslo i 2022. Etter eit par konsertar var dei klare for innspeling i Høyjord stavkyrkje i Sandefjord. Kyrkjerommet kler instrumenta og musikken fortreffeleg.

Sju av låtane er improvisasjonar. I tillegg har dei spelt inn to låtar av Reijseger, den lagnadstunge «Ginnung Where You There» og den langt ljosare «Elena Shining Light». Det er ei nærast oppsiktsvekkjande ro over musikken og musiseringa, som om dei seier til kvarandre at det går seg nok til. Det gjer det stort sett.

Berre unntaksvis går det litt på tomgang («Heaven nor Earth»). Dei to er svært opptekne av korleis instrumenta kling i hop i ulike posisjonar og frekvensområde. På sitt aller beste kombinerer dei interessa for klang og samklang med historieforteljing. Høgdepunktet på plata er i så måte «Ekko», men også «lydarslåtten» «Spragle» og «Thin Air» med den leikne introen er døme på duosamarbeid med nærast telepatisk kommunikasjon.

Lars Mossefinn

Lars Mossefinn er frilans journalist og fast jazzmeldar i Dag og Tid.