Jazz

Andreas Røysum Ensemble:

Fredsfanatisme

Henriette Eilertsen, fløyte; Signe Emmeluth, altsaks; Marthe Lea, tenorsaks; Andreas Røysum, klarinett, bassklarinett og kontrabassklarinett; Hans P. Kjørstad, fiolin; Joel Ring, cello og bass; John Andrew Wilhite-Hannisdal og Christian Meaas Svendsen, bass; Ivar Myrset Asheim, trommer og perkusjon. Motvind Records

Anders Røysum er klar med andreplata halvtanna år etter debuten og tek konseptet eit steg vidare. Framleis er det snakk om ei blanding av etnisk inspirert musikk og frijazz, men denne gongen tenderer det etniske mot afrikansk musikk. Ensemblet er mest uendra, men tablaen er ikkje med denne gongen. Ein dimensjon går tapt, men Asheim blir tydlegare igangsetjar og kraftsentrum.

Musikken er ein kompleks vev av korte, men skiftande riff, korte, ekspressive utblåsingar og eit massivt rytmisk fundament med bassane og celloen som putrar og går. Hovudmønsteret blir brote gjennom dei frie «samtalane» «Kvintett (for Leroy Jenkins)» og «Kvartett (for Joseph Jarman)», ein nydeleg gongsekvens og ditto rubato blåseintro på den japanskinspirerte «Sawakuro», der Marthe Lea spelar utruleg vakkert – både lyrisk og intenst.

Røysum og ensemblet har lukkast betre denne gongen med å vikla i hop det arrangerte og det improviserte. Det heile verkar meir organisk. Likevel verkar det komplekse så enkelt og naturleg i hendene på eit knippe musikarar som har knekt koden. Den velstrukturerte «Sawakuro» og den rabiate og lett kaotiske «Jakter på Røyskatten» er høgdepunkt på ei plate som ikkje har djupe dalar.

Lars Mossefinn

Lars Mossefinn er frilans journalist og fast jazzmeldar i Dag og Tid.