I morgon kveld gjestar Susanna Wallumrød Litteraturhuset i Bergen for å framføre songar frå Baudelaire & Piano, albumet der ho toneset ti dikt frå Charles Baudelaires Det vondes blomar. Utgivinga fekk flotte kritikkar då ho kom ut for vel eit år sidan.

Det har gått 200 år sidan Charles Baudelaire vart fødd, 9. april i Paris, og det skortar ikkje på jubileumsmarkeringar rundt om i verda. Mellom mine favorittar dette året er nok ein gimmick, pønska ut av den italienske bonden som pløgde portrettet til poeten inn i ei mark og la inn ein aldri så liten referanse til eit visst virus («Le Virus du Mal»).

Sjølv hadde eg mitt første møte med Baudelaires poesi i eit auditorium som litteraturstudent midt på 1990-talet, då eg hadde den udelte gleda av å høyre Per Buvik førelese om temaet. Ei perfekt oppvarming til konserten klokka halv sju bør difor vere å høyre den framifrå formidlaren Buvik snakke om Baudelaire i Litteraturhuset ein time før Wallumrød plasserer seg ved tangentane.

Øyvind Vågnes